മുസ്ലിം വേഷം ധരിച്ച ഒരു സ്ത്രീ തന്‍റെ മുന്നില്‍ നില്‍ക്കുന്ന യുവതിയെ സൂചി കൊണ്ട് കുത്തി അപായപ്പെടുത്താന്‍ ശ്രമിക്കുന്നു എന്നാരോപിച്ച് ഒരു വീഡിയോ വൈറലാകുന്നുണ്ട്,
പ്രചരണം
മുസ്ലിം വേഷം ധരിച്ച സ്ത്രീ ക്യൂവില്‍ തന്‍റെ മുന്നില്‍ നില്‍ക്കുന്ന യുവതിയെ അവള്‍ അറിയാതെ തന്‍റെ കൈയ്യിലുള്ള എന്തോ ഒന്നു കൊണ്ട് തോളില്‍ സ്പര്‍ശിക്കുന്നതും യുവതി ഞെട്ടി തിരിഞ്ഞു നോക്കുന്നതും എന്തോ സംസാരിക്കുന്നതും ദൃശ്യങ്ങളില്‍ കാണാം. “ഞെട്ടിക്കുന്ന ഈ വീഡിയോ ഇപ്പോൾ സോഷ്യൽ മീഡിയയിൽ വൈറലായിരിക്കുകയാണ്. അതിൽ ഒരു മുസ്ലീം സ്ത്രീ മറ്റൊരു യുവതിയുടെ ചുമലിൽ സൂചി കുത്തുന്നത് കാണാം. ഇത് അങ്ങേയറ്റം അപകടകരമാണ്. കാരണം സൂചിയിൽ എച്ച്ഐവി ഉൾപ്പെടെയുള്ള ഏതെങ്കിലും മാരകമായ വൈറസ് ബാധിച്ചേക്കാം. തിരക്കേറിയ സ്ഥലങ്ങളിൽ ജാഗ്രത പാലിക്കുക! ദയവായി ഈ വീഡിയോ എല്ലാവരിലുമെത്തട്ടെ!” എന്ന അടിക്കുറിപ്പുമുണ്ട്.
https://archive.org/details/screencast-www_facebook_com-2024_10_04-09_52_29
എന്നാല്‍ തെറ്റിദ്ധരിപ്പിക്കുന്ന പ്രചരണമാണ് ഇതെന്ന് അന്വേഷണത്തില്‍ ഞങ്ങള്‍ കണ്ടെത്തി,
വസ്തുത ഇതാണ്
വീഡിയോ കീ ഫ്രെയിമുകളുടെ റിവേഴ്സ് ഇമേജ് അന്വേഷണം നടത്തിയപ്പോള്‍ 2022 ഡിസംബറിൽ പങ്കിട്ട ടർക്കിഷ് സോഷ്യൽ മീഡിയ പോസ്റ്റുകളിൽ ഈ വീഡിയോ ഞങ്ങൾ കണ്ടെത്തി. ഒരു വിവാഹ ചടങ്ങിനിടെ ചിത്രീകരിച്ചതാണ് ഈ വീഡിയോ എന്നാണ് അടിക്കുറിപ്പ്. ടർക്കിഷ് മീഡിയ പ്ലാറ്റ്‌ഫോമായ ‘Aykiri’ യുടെ ഔദ്യോഗിക ഫേസ്ബുക്ക് പേജില്‍ 2022 ഡിസംബർ 22-ലുള്ള പോസ്റ്റിലാണ് ഞങ്ങൾ ഈ വീഡിയോ കണ്ടെത്തിയത്. ചിത്രീകരിച്ച സമയത്തുള്ള യഥാര്‍ത്ഥ ഓഡിയോ ഈ വീഡിയോയില്‍ കേള്‍ക്കാം.
ഈ വീഡിയോ തുർക്കിയിൽ നിന്നുള്ളതാണെന്നും ഒരു വിവാഹ ചടങ്ങിൽ നിന്നുള്ളതാണെന്നും പോസ്റ്റിന്‍റെ അടിക്കുറിപ്പിൽ നൽകിയിരിക്കുന്ന വിവരങ്ങൾ സ്ഥിരീകരിക്കുന്നു.
ഈ സംഭവത്തെക്കുറിച്ച് പ്രസിദ്ധീകരിച്ച തുർക്കി മാധ്യമ റിപ്പോർട്ടുകൾ ലഭ്യമാണ്. വീഡിയോ ഇന്ത്യയുമായി ബന്ധപ്പെട്ടതല്ലെന്ന് റിപ്പോർട്ടുകൾ വഴി ഉറപ്പിക്കാം. 2022ൽ തുർക്കിയിലെ ഒരു വിവാഹ വേദിയില്‍ സ്ഥാപിച്ചിരുന്ന സിസിടിവി ക്യാമറയുടെ ദൃശ്യങ്ങൾ വിവാഹശേഷം പരിശോധിച്ചപ്പോഴാണ് സംഭവം പുറത്തറിയുന്നത്. ഈ സമയത്ത് മുസ്ലിം വേഷം ധരിച്ച വയോധിക സൂചി ഉപയോഗിച്ച് ആഭരണങ്ങൾ ഉണ്ടാക്കുകയും അവളുടെ മുന്നിൽ നിൽക്കുന്ന പെൺകുട്ടി പാട്ട് പാടുകയും ചെയ്യുകയായിരുന്നുവെന്ന് മാധ്യമങ്ങൾ റിപ്പോർട്ട് ചെയ്യുന്നു. തുടർന്ന് ആ സ്ത്രീ ആഭരണങ്ങൾ ഉണ്ടാക്കാൻ ഉപയോഗിക്കുന്ന സൂചി പെൺകുട്ടിയുടെ തോളിൽ കുത്തുകയായിരുന്നു. സൂചിയിൽ എച്ച്ഐവി ബാധിച്ചതായി ഒരു റിപ്പോർട്ടിലും വിവരമില്ല, ഈ സംഭവത്തിൽ വർഗീയ കോണുകൾ പരാമർശിച്ചിട്ടില്ല.
നിഗമനം
പോസ്റ്റിലെ പ്രചരണം തെറ്റിദ്ധരിപ്പിക്കുന്നതാണ്. തുർക്കിയിൽ നിന്നുള്ള ഒരു പഴയ വീഡിയോയാണ് തെറ്റായ വർഗീയ അവകാശവാദത്തോടെ പ്രചരിപ്പിക്കുന്നത്. ഒരു വിവാഹത്തിനിടെ നടന്ന തമാശ സംഭവം എന്നു തുര്‍ക്കി മാധ്യമങ്ങള്‍ വിശേഷിപ്പിച്ച ദൃശ്യങ്ങള്‍ക്ക് ഇന്ത്യയുമായി യാതൊരു ബന്ധവുമില്ല.
