പാക്കിസ്ഥാനിലെ വീഡിയോ ഇന്ത്യയിൽ മുസ്ലിം കുട്ടികൾ റെയിൽവേ ട്രാക്ക് നശിപ്പിക്കുന്നു എന്ന തരത്തിൽ തെറ്റായി പ്രചരിപ്പിക്കുന്നു.
ഇന്ത്യയിൽ മുസ്ലിം കുട്ടികൾ റെയിൽവേ ട്രാക്കിനെ കേടുപാട് വരുത്തുന്ന ദൃശ്യങ്ങള്‍ എന്ന തരത്തില്‍ ഒരു വീഡിയോ സമൂഹ മാധ്യമങ്ങളില്‍ പ്രചരിപ്പിക്കുന്നുണ്ട്. ഇന്ത്യയില്‍ ഈയിടെയായിയുണ്ടാകുന്ന റെയില്‍വേ അപകടങ്ങള്‍ ഇത് പോലെ സൃഷ്ടിച്ച് കേന്ദ്ര സര്‍ക്കാരിനെ കുറ്റപ്പെടുത്താനുള്ള ശ്രമമാണെന്നും ഈ വീഡിയോ പ്രചരിപ്പിക്കുന്ന പോസ്റ്റുകള്‍ അവകാശപെടുന്നു.
പക്ഷെ ഞങ്ങൾ ഈ പ്രചരണത്തെ കുറിച്ച് അന്വേഷിച്ചപ്പോൾ ഈ വീഡിയോ ഇന്ത്യയിലെതല്ല. എന്താണ് യാഥാർഥ്യം നമുക്ക് നോക്കാം.
പ്രചരണം
മുകളിൽ നൽകിയ പോസ്റ്റിൽ നമുക്ക് ചില കുട്ടികള്‍ ഒരു റെയില്‍വേ ട്രാക്ക് നശിപ്പിക്കുന്നതായി കാണാം. ഈ പോസ്റ്റിന്‍റെ അടികുറിപ്പില്‍ പറയുന്നത് ഇങ്ങനെയാണ്: “ശന്തിപ്രിയമായ ജനങ്ങള്‍ അവരുടെ ജോലി ചെയ്യുന്നു. പപ്പുവിന്‍റെ ടൂള്‍കിറ്റ്.” പപ്പു എന്ന് രാഹുല്‍ ഗാന്ധിയെ പരിഹസിച്ച് വിളിക്കുന്ന പേരാണ്. ഈ കാണുന്ന കുട്ടികള്‍ ഇന്ത്യയില്‍ റെയില്‍വേ അപകടങ്ങള്‍ വരുത്തി കേന്ദ്ര സര്‍ക്കാരിനെ കുറ്റപെടുത്താനുള്ള ഗൂഡാലോചനയാണ് പോസ്റ്റില്‍ പറയാന്‍ ഉദ്ദേശിക്കുന്നത്. താഴെ കാണുന്ന പോസ്റ്റിലും ഈ വീഡിയോ പ്രചരിപ്പിക്കുന്നുണ്ട്. ഈ പോസ്റ്റിന്‍റെ അടികുറിപ്പില്‍ ഈ വാദം കുറിച്ച് കൂടി വ്യക്തമായി എഴുതിയിട്ടുണ്ട്.
ഈ വീഡിയോയെ കുറിച്ച് പോസ്റ്റിന്‍റെ അടികുറിപ്പിൽ പറയുന്നത് ഇങ്ങനെയാണ്: “ഇന്ത്യയിൽ സങ്കി ഫാസിസ്റ്റ് ഭരണം അട്ടിമറിക്കാൻ കഷ്ടപ്പെടുന്ന മതേതര മദ്രസ കുട്ടി സുടാപ്പികൾ. മദ്രസ എല്ലാം തന്നെ സൗദി അറേബ്യ മാതിരി ഇടിച്ചു കളയണം”
എന്നാല്‍ എന്താണ് ഈ വീഡിയോയുടെ സത്യാവസ്ഥ നമുക്ക് അന്വേഷിക്കാം.
വസ്തുത അന്വേഷണം
ഞങ്ങള്‍ വീഡിയോയുടെ സ്ക്രീന്‍ഷോട്ടുകള്‍ ഗൂഗിളില്‍ റിവേഴ്സ് ഇമേജ് അന്വേഷണം നടത്തി പരിശോധിച്ചു. പരിശോധനയുടെ ഫലങ്ങളില്‍ ഞങ്ങള്‍ക്ക് ഈ വീഡിയോ ഫേസ്‌ബുക്കിൽ ലഭിച്ചു. ഈ വീഡിയോയുടെ ശീർഷകം പ്രകാരം ഈ സംഭവം ഇന്ത്യയിലേതല്ല പാക്കിസ്ഥാനിലെ കറാച്ചിയിലേതാണ്. 6 ഡിസംബർ 2023നാണ് ഈ വീഡിയോ പ്രസിദ്ധികരിച്ചിരിക്കുന്നത്.
പോസ്റ്റ് കാണാൻ - Facebook | Archived
വീഡിയോയുടെ അടിക്കുറിപ്പ് പ്രകാരം ഈ വീഡിയോ പാകിസ്ഥാനിലെ കറാച്ചിയിലെത്താണ്. ഇവിടെ സർതാജ് ഖാൻ ഗേറ്റിന്‍റെ അടുത്തുള്ള റെയില്‍വേ ക്രോസിംഗില്‍ ചില കുട്ടികള്‍ ട്രക്കില്‍ നിന്ന് ഫിഷ്‌ പ്ലേറ്റും നട്ട് ബോള്‍ട്ടും അഴിച്ച് എടുത്ത് വില്‍ക്കും. ഈ ദൃശ്യങ്ങളിൽ നമ്മൾ ഇതാണ് കാണുന്നത്. ഈ വീഡിയോ വൈറൽ ആയതിന് ശേഷം കറാച്ചി പോലീസ് ഈ കുട്ടികളെ അറസ്റ്റ് ചെയ്തു.
ഇവർക്കെതിരെ എടുത്ത നടപടിയെ കുറിച്ച് കറാച്ചി പോലീസ് അവരുടെ ഔദ്യോഗിക ഫേസ്‌ബുക്ക് പേജിൽ ഒരു വീഡിയോ ഇട്ട് അറിയിച്ചു. ഈ വീഡിയോ നമുക്ക് താഴെ കാണാം.
നിഗമനം
മുസ്ലിം കുട്ടികൾ റെയിൽവേ ട്രാക്കിൽ കേടുപാട് വരുത്തി അപകടം സൃഷിടിക്കാൻ ശ്രമിക്കുന്നു എന്ന തരത്തിൽ പ്രചരിപ്പിക്കുന്ന ദൃശ്യങ്ങൾ ഇന്ത്യയിലേതല്ല. ഈ ദൃശ്യങ്ങൾ പാകിസ്ഥാനിൽ റെയിൽവേ ട്രാക്കിൽ കഴിഞ്ഞ ഡിസംബറിൽ നടന്ന മോഷണത്തിന്‍റെ ഒരു സംഭവത്തിന്‍റെതാണ് എന്ന് അന്വേഷണത്തിൽ നിന്ന് വ്യക്തമാകുന്നു.