പൊതു തെരഞ്ഞെടുപ്പ് അടുത്ത് വരുന്നതോടെ രാഷ്ട്രീയ പാര്‍ട്ടികള്‍ ശക്തമായി തെരഞ്ഞെടുപ്പ് പ്രചരണത്തിന് ഇറങ്ങിയിരിക്കുകയാണ്. ഇതിനിടെ ഉത്തരേന്ത്യയില്‍ സ്ത്രികള്‍ ബിജെപിയുടെ പ്രചരണത്തിനെത്തിയ ഒരു വാഹനത്തെ അസഭ്യം വിളിച്ച് ഗ്രാമത്തില്‍ നിന്ന് പുറത്താക്കുന്നത്തിന്‍റെ ദൃശ്യങ്ങള്‍ സമൂഹ മാധ്യമങ്ങളില്‍ വ്യാപകമായി പ്രചരിപ്പിക്കുകയാണ്.
പക്ഷെ ഈ വീഡിയോയെ കുറിച്ച് ഞങ്ങള്‍ അന്വേഷിച്ചപ്പോള്‍ വീഡിയോ 3 കൊല്ലം പഴയതാണെന്ന് കണ്ടെത്തി. എന്താണ് സംഭവം നമുക്ക് നോക്കാം.
പ്രചരണം
മുകളില്‍ നല്‍കിയ പോസ്റ്റില്‍ നമുക്ക് ബിജെപിയുടെ പ്രചരണത്തിന് വന്ന വാഹനത്തെ ഗ്രാമവാസികള്‍ അസഭ്യ ഭാഷയില്‍ തിരിച്ച് പോകാന്‍ നിര്‍ദേശിക്കുന്നതായി കാണാം. ജനങ്ങളുടെ രോഷം കണ്ട് വാഹനത്തിന്‍റെ ഡ്രൈവറും വണ്ടി തിരിച്ച് പോകുന്നതായി നമുക്ക് കാണാം. ഇതിനിടെ ഗ്രാമവാസികള്‍ വാഹനത്തിന്‍റെ മുകളിലുള്ള പോസ്റ്ററുകളും വലിച്ച് കീറുന്നതായി നമുക്ക് കാണാം.
ഈ വീഡിയോയെ കുറിച്ച് പോസ്റ്റിന്‍റെ അടികുറിപ്പില്‍ പറയുന്നത് ഇങ്ങനെയാണ്: “അവസാനത്തെ അവസരമാണ് ഇത് ഉപയോഗിച്ചിലെങ്കില്‍ പിന്നെ ഒരിക്കിലും ഉപയോഗിക്കാന്‍ കഴിയില്ല എന്ന് ജനങ്ങള്‍ക്ക് ഒക്കെ മനസിലായി തുടങ്ങിയിട്ടുണ്ട് ചിലരെങ്കിലും പ്രതികരിച്ച് തുടങ്ങി”
എന്നാല്‍ ഈ വീഡിയോ നിലവില്‍ ബിജെപിക്കെതിരെയുണ്ടായ രോഷത്തിന്‍റെതാണോ? എന്താണ് സത്യാവസ്ഥ നമുക്ക് അന്വേഷിക്കാം.
വസ്തുത അന്വേഷണം
വീഡിയോയില്‍ ഹിന്ദിയിലാണ് സംസാരിക്കുന്നത്. അതിനാല്‍ ഞങ്ങള്‍ വീഡിയോയില്‍ കാണുന്ന സംഭവവുമായി ബന്ധപെട്ട കീ വേര്‍ഡുകള്‍ ഹിന്ദിയില്‍ ഫെസ്ബൂക്കില്‍ തെരഞ്ഞു നോക്കി. അതില്‍ ഞങ്ങള്‍ക്ക് ഈ സംഭവത്തിന്‍റെ നീണ്ടുള്ള വീഡിയോ ലഭിച്ചു.
പോസ്റ്റിന്‍റെ അടികുറിപ്പ് പ്രകാരം ഈ വീഡിയോ 2020ല്‍ നടന്ന ബീഹാര്‍ നിയമസഭ തെരഞ്ഞെടുപ്പ് സമയത്ത് നടന്ന സംഭവത്തിന്‍റെതാണ്. ബീഹാറിലെ മുസഫ്ഫര്‍പ്പൂറിലെ കുഠനി നിയമസഭ മണ്ഡലത്തിലാണ്‌ നടന്നത്. ഇവിടെയുള്ള ബിജെപി സ്ഥാനാര്‍ഥി കേദാര്‍ പ്രസാദ് ഗുപ്തയുടെ പ്രചരണത്തിന്‍റെ വാഹനം കുഠനിയില്‍ എത്തിയപ്പോള്‍ ഗ്രാമവാസികള്‍ ഈ വാഹനത്തിനെ തടഞ്ഞു. വാഹനത്തിനെതിരെ തെറികള്‍ വിളിച്ച് ഓടിച്ചു.
ഈ സംഭവത്തിനെ കുറിച്ച് ഹിന്ദി മാധ്യമ വെബ്സൈറ്റ് ജന്‍സത്തയും റിപ്പോര്‍ട്ട്‌ ചെയ്തിട്ടുണ്ട്. ജന്‍സത്തയുടെ റിപ്പോര്‍ട്ട്‌ പ്രകാരം എം.എല്‍.എ. ആയിട്ടും അഞ്ച് കൊല്ലത്തില്‍ ഒരു തവണ പോലും കേദാര്‍ ഗുപ്ത ആ ഭാഗത്തേക്ക് വന്നില്ല. ഇപ്പോള്‍ വോട്ട് ചോദിച്ച് വന്നപ്പോള്‍ സ്ത്രികള്‍ രോഷത്തോടെ വാഹനത്തിനെതിരെ തെറിവിളി നടത്തി ഗ്രാമത്തില്‍ നിന്ന് ഓടിച്ചു വിട്ടു.
നിഗമനം
ബിജെപിക്ക് വേണ്ടി പ്രചരണം നടത്താനെത്തിയ വാഹനത്തെ സ്ത്രികള്‍ അസഭ്യം വിളിച്ച് ഓടിക്കുന്നത്തിന്‍റെ ദൃശ്യങ്ങള്‍ നിലവിലെതല്ല. ഈ സംഭവം 3 കൊല്ലം മുമ്പ് ബീഹാറില്‍ നടന്നതാണ്. വരാന്‍ പോകുന്ന പൊതുതെരെഞ്ഞെടുപ്പിന്‍റെ പ്രചരണവുമായി ഈ സംഭവത്തിന് യാതൊരു ബന്ധവുമില്ല.
ഞങ്ങളുടെ ഏറ്റവും പുതിയ ഫാക്റ്റ് ചെക്കുകള്‍ ലഭിക്കാനായി ഞങ്ങളുടെ WhatsApp ചാനല്‍ Fact Crescendo Malayalam ഈ ലിങ്ക് ഉപയോഗിച്ച് ഫോളോ ചെയുക.
ഞങ്ങളെ സോഷ്യല്‍ മീഡിയയില്‍ ഫോളോ ചെയ്യുക:
Facebook | Twitter | Instagram | Telegram | WhatsApp (9049053770)
Title:തെരഞ്ഞെടുപ്പ് പ്രചരണത്തിന് വന്ന ബിജെപിയുടെ വാഹനം സ്ത്രികള്‍ നാടുകടത്തുന്നത്തിന്‍റെ പഴയ വീഡിയോ വൈറല്‍ ആകുന്നു…
Written By: Mukundan KResult: False
